Rawayat pasandi ka rawayya hamein apni Khuda-dad bulahat ke saath wafadari nibhane mein bahut madadgar sabit ho sakta hai. Albatta, rowayat hamein maazi ka ghulam bhi bana sakti hain aur inn ki wajah se hum iss baat ko nazar-andaz kar dete hain ke asal ahmiyat ki hamil cheez kaun si hai. Iss ki ek misal America ke ek bahut chhote giroh mein dekhi ja sakti hai jinhein Hook and Eye Baptists kaha jata hai. Pichhli sadi ke doran, jab karkhanon mein bachon ki mushaqqat ke hawale se koi murawaja qawaneen raij nahi thay, to bahut se bachon ko libas par button tankne ke liye bahut taveel ghanton tak kaam par rakha jata tha. Iss se na sirf woh bache taleem se mahroom reh gaye balkay unhein majbooran bahut kam ujrat par aur khofnak halat mein kaam karna para. Bahut se Masihi iss amal se sakht pareshan thay. Ek kalisiya ne buttonon wale kapre pehanne se inkar kar ke iss sulook ke khilaf ehtijaj karne ka faisla kiya. Woh sirf wahi kapre pehante thay jo buttonon ke bajaye hook aur eye (hook aur kaaj) se band hote thay, issi wajah se unn ka naam Hook and Eye Baptists par gaya. Yeh ek samaji masle par bahut achha aur munasib radd-e-amal tha. Tahum, aaj bhi kuch Hook and Eye Baptists log maujood hain. Agarchay ab to aise qawaneen maujood hain jo bachon ko iss noiyat ke har istehsal se bachate hain, magar woh log aaj bhi apni issi rowayat se chimte hue hain. Haqiqat yeh hai ke ab iss rowayat ki qatan koi zaroorat nahi rahi, lekin iss giroh ke liye rowayat bizaat-e-khud iss ke maqsad se zyada ahem ban kar reh gayi hai.