یسوع ناں دیاں ملیاں گواہیاں نیں اوہدے بعد سب مکیاں خدایاں نیں

(دوہڑا)
تیرے خون نے کر آزاد دتا
ساہنوں موت دیاں اسیراں نوں
ساڈے کھوٹے بخت کھرے کر کے
کیتا معاف سب تقصیراں نوں
...
(استھائی)
یسوع ناں دیاں ملیاں گواہیاں نیں
اوہدے بعد سب مکیاں خدایاں نیں
۱
لُوں لُوں دے وچ رچیا ہویا کلمۂ حق تعالیٰ ،
راہ حق زندگی تیتھوں لبھدی تیرا بول ہے بالا
معبوداں دے ناواں وچوں تیرا نام ہے اعلیٰ
ازل دے تخت تے بیٹھا ایں تُوں اچیاں شاناں والا
اوہدے دل دیاں مراداں بھر آئیاں نیں
جنے آساں بس یسوع اُتے لائیاں نیں
۲
پڑھ لے بندیا اُٹھ جانا ایں فرشوں سخن خدا دا
ہن ملیا اے فیر نئیں ملنا تینوں وقت دعا دا
توں نہ جانیں انت وی اپنے آؤندے جاندے ساہ دا
رہنا اکو نام سدا نیں اوہو نام خدا دا
توبہ کر لے تُوں کہندیاں سچائیاں نیں
گھاٹاں موت دیاں سر چڑھ آئیاں نیں
۳
بیت لحم وچ اُتری لوکو روحِ پاک خدائی
اوہنوں ویکھن کائنات دی خلقت ساری آئی
ہاڑے پاون فوجاں نوں سی پئے گئی وچ لڑائی
سارے مل کے اک دوجے نوں دیندے پھرن ودہائی
ہتھوں کنجیاں شیطان دے چھڑائیاں نیں
میرے یسوع سب روحاں بچائیاں نیں