یسوع دی شان جیہا لختِ یزدان جیہا

(دوہڑا)
نگر نگر دیاں گلیاں دے وچ
ہوکا دیندا ای اِک ہرکارا
توبہ کر لوؤ مُڑ نئیں جے لبھنا
لوکو منگیاں وقت اُدھارا
میرے مگرے آؤندا پیا جے
اوہ میرا مالک بخشن ہارا
طالبؔ ایہہ گل کھول کے دسدا
جدوں پچھدے لوک دوبارہ
۔۔۔
(استھائی)
یسوع دی شان جیہا لختِ یزدان جیہا
ہور دُنیا تے کوئی نئیں دوسرا
دم دم بولو دم دم ہر دم
دم دم بولو دم دم ہر دم
اِک میرا یسوع اے تے اِک مریم
۱
دساں کیہہ میں اوس دیاں لاجوابیاں
اوہدے اگے سبھے طاقتاں سلامیاں
قدرتاں اوہدیاں نیں بے حسابیاں
اوہدے ہتھ وچ اسما نی چابیاں
کردے پابند تے پابند ہندا اے
یسوع آگھے بند ہو جا بند ہندا اے
کھلے جدوں آکھے کھل جا سم سم
دم دم بولو دم دم ہر دم
۲
زندگی دے پھُلاں دا اے باغ جمیا
امن دی راتاں دا سہاگ جمیا
پاک تے بے عیب تے بے داغ جمیا
بن کے او پاپیاں دا بھاگ جمیا
وڈے وڈے کم کر دا اے عمرے
نکا جنا لڑکا افعی نوں پھڑے
بھید او کلام دے بیان جا کرے
کن ہون عالماں دے سن کے کھڑے
چُٹکی کُو مٹی لے کے تلی تے دھرے
پھُوک مار اوہدے وچ دم وی بھرے
پھوک جدوں ماری مٹی رُوپ دھار دی
چڑی بن جاندی تے اُڈاری مار دی
جہیڑا ویکھے اوہدا ٹُٹ جاندا اے بھرم
دم دم بولو دم دم ہر دم
۳
جگ اتے یسوع دی پیدائش وکھری
پہلی واری ویکھی اے نمائش وکھری
پیار اوہنوں پائی فرمائش وکھری
چرنی چ اوس دی پیدائش وکھری
چرنی دی شان آسمان مندا
وڈے وڈے ملکاں دا مان مندا
جُگ جُگ وسے اوہدا بیت لحم
دم دم بولو دم دم ہر دم
۔۔۔
دم بولے دم دم بولو یسوع دم دم
ویکھیں ایک دم ہندا اے کرم
دم دم بولئے تے مٹ جاندے غم
جہیڑا دم بولے نہ او دم تے ستم
تیرے اُتے کنے پھُوک چھڈیا اے دم
دم کہیا دم ڈگ پیندا نہ گھڑام
سچی گل کہندیاں تے آؤندی اے شرم
دم والے اوہدے آگے مار دے قدم
۔۔۔
عدن چ شروع ہوئی پیار رسم
رسم نبھائی نہ تے ٹُٹ گئی قسم
فیر دتا پیار نے پیار نوں جنم
جسم دے واسطے وٹا لیا جسم
چرنی دے وچ پہلاں رکھیا قدم
پوری کیتی کلوری تے پیار دی قسم
دم دم بولو دم دم ہر دم
۔۔۔
چھڈ دے نکوریا کیہہ دم دا وساہ
سیدھی سادی گل وچ گنجھلاں نہ پا
زندگی دا والی یسوع حق نالے راہ
نبیاں تے رہنماں خداواں دا خدا
۴
صلح دا شاہزادہ جے عجیب تے مشیر
شروع ایہو جگ دا تے ایہو اے اخیر
رب اِک روح اے اوس دا شریر
عاملاں تے کاملاں دا سب دا اے پیر
سب اُتے ایہدی سرداری چلدی
رب دی سونہہ اک وی نئیں گل ٹلدی
جہیڑی گل لکھ دیوے لوہے دی قلم
دم دم بولو دم دم ہر دم
۵
بندے وچ آکھدے نیں پنچ تک نیں
ونجلی دے وانگوں وچ چھید ست نیں
نور دے چراغدان ست بلدے
ست ای کلیسیا دے نال چلدے
ستاں چ سنائی ساری بات کھول کے
سُولی اُتے ست کلمات بول کے
کنجیاں وی کول دسو کِدھے ہتھ نیں
کھولیاں کتاب دیاں مہراں ست نیں
ست بسم اللہ میری جان آکھدے
ست رنگ ست آسمان آکھدے
سُر وچ سُر پا کے گیت چلدا
ستاں سُراں نال ہے سنگیت چلدا
سارے گا ما پا دھا نی سا گاؤ سرگم
دم دم بولو دم دم ہر دم
۔۔۔
دم بولے دم دم گلی گلی
میں افسر اوس اکبر ناصری دا
میں نوکر اوس دلبر ناصری دا
میں راہ واں اپنے رہبر ناصری دا
میں اک ادنیٰ پیامبر ناصری دا
گلی گلی ۔۔۔ دم بولے دم دم گلی گلی
۔۔۔
میرا تے اوس دا اے فرق چوکھا
ذرا سن لے میرے تُوں بھلیا لوکا
او آقا اے تے میں نوکر کروکا
دتی آواز مَیں اے مار ہوکا
گلی گلی ۔۔۔ دم بولے دم دم گلی گلی
۔۔۔
کرے گا صاف اگ دے بھسمیاں نوں
میرا سلام اوہدے چشمیاں نوں
میری توبہ میں اِس قابل نئیں آں
اوہدی جُتیاں دے کھولاں تسمیاں نوں
گلی گلی ۔۔۔ دم بولے دم دم گلی گلی
۶
دکھیاں نوں دسو کیہڑا چین دیندا اے
انھیاں نوں مٹی گوہ کے نین دیندا اے
کوڑھیاں دے کوڑھ نئیوں رہن دیندا اے
ہوکے نئیوں غماں والے لین دیندا اے
زندگی نوں عرشاں تھوں ڈور لگدی
لولیاں نوں نویں سرے ٹور لگدی
کِتوں نئیں جے سجنو اے ہور لگدی
سولی تھلے جنتاں دی مہر لگدی
جہدے اُتے ہو جاندا اوہدا اے کرم
دم دم بولو دم دم ہر دم
۷
دسو کہیڑا پانیاں تے چل سکدا اے
بول کے او جھکڑاں نوں کھل سکدا اے
بپھرے سمندراں نوں ٹھل سکدا اے
جھکڑاں نوں پُٹھے پیریں چھل سکدا اے
ڈر دا طوفان اگوں لُک جاندا اے
جدوں آکھے رُک جا او رُک جاندا اے
اک وی نئیں پُٹ سکدا او قدم
دم دم بولو دم دم ہر دم
۸
بدروحاں کدے کولوں کوف کھاندیاں
اوہناں دیاں کہدے کولوں جاناں جاندیاں
زندگی تے موت اوہدیاں نیں باندیاں
گئیاں جاناں دسو کِنے موڑ آندیاں
قبر چ مُردے نوں واج مار کے
آکھدا اے مِل مینوں باہر آن کے
جتھے ہووے یسوع اوتھے موت دا کیہ کم
دم دم بولو دم دم ہر دم
۹
کئیاں مینوں اُلٹے سوال کیتے نیں
ہورناں وی مُردے جوال دِتے نیں
میں کہناں کوئی نئیں جوال سکدا
قبراں دے وچوں نئیں اُٹھال سکدا
۱۰
ایس گل اُتے ہے ایمان سب دا
لاتبدیل ہے کلام رب دا
اک ایہدا نقطہ مٹا نئیں سکدا
کوئی وی گھٹا یا ودھا نئیں سکدا
اپنے ایمان دی دلیل بدلی
جہیڑے لوکی آکھدے انجیل بدلی
عملاں دے ہور وچوں ہور لبھدے
ڈٹھے اساں ایہو جئے نیں بندے رب دے
پُکراں ہٹایاں وچوں نکلے صنم
دم دم بولو دم دم ہر دم
۔۔۔
کفارہ بن کے آ گئی روح خدا دی
غلامی تھوں جنے دتی آزادی
میں توبہ دی پیار کر دا منادی
لگی آؤندی سواری شہنشاہ دی
گلی گلی ۔۔۔ دم بولے دم دم گلی گلی
۱۱
آؤ اج حق دی پچھان کر لوؤ
گل میری ول جے دھیان کر لوؤ
گل میری نئیں جے دُکھاویں دُکھدی
پھل نال ای ہندی اے پچھان رُکھ دی
سُکھ دی نئیں طالباؔ سوغات لبھنی
یسوع بنا کتھوں نئیں نجات لبھنی
جھوٹھ نئیں میں کہندا مینوں رب دی قسم
دم دم بولو دم دم ہر دم