تو کردے فیصلہ حق سچ دا

تو کردے فیصلہ حق سچ دا
دس ایہدے گناہ دی سزا کیہ اے
پتھراؤ کرئیے یا چھڈ دئیے
ایس گل وچ تیری رضا کیہ اے
۱
بدکار ضرور سزا پاوے
اے حکم شریعت فرماوے
سرِ عام کیتا سنگسار جاوے
تُو دس فیر حکمِ خدا کیہ اے
۲
ساہنوں رب وچ دِسنا ایں شامل تُوں
اُستاد شرع وچ کامل تُوں
جہیڑا فتویٰ لاؤنا ای لا ایس تے
ایہدے پاپ دا بدلہ روا کیہ اے
۳
اے سُن یسوع فرما یا اے
کرو جیویں شرع وچ آیا اے
جیویں موسیٰ نے حکم سنایا اے
میری وکھری ہور صلاح کیہ اے
۴
مارو پتھر شرع دا من کہنا
تُساں روکیاں بے شک نئیں رہنا
ایس گل دا چیتا رکھ لینا
مارے جو جو نہ جانے گناہ کیہ اے
۵
یسوع کہہ اے زمین تے لکھن لگا
آپو اپنا سب نوں فکر پیا
اعمال نامہ جے اساں منیا
رئی بے چتراں لئی جاہ کیہ اے
۶
گئے طالباؔ چھڈ وچاری نوں
یسوع ویکھ کے نازک ناری نوں
تینوں معاف کیتا دکھیاری نوں
توبہ کر لے تے فیر سزا کیہ اے