کسے دی چُغلی کرئیے نہ جھوٹ دے وہیڑے وڑئیے نہ

کسے دی چُغلی کرئیے نہ، جھوٹ دے وہیڑے وڑئیے نہ
سچی گل کرن توں نہ ڈرئیے ، کفر دی بیڑی چڑھیے نہ
۱
دُنیا دے توں عیب ویکھنا ایں، اپنے گھر ول ویندا نئیں
کنداں اُتے پوچے پھیریں، اندر باری دیندا نئیں
اپنے وہیڑے دے وچ بندیا، تکلن بازی کرئیے نہ
۲
دوجے دی اَکھ وچ تنکا ویکھیں، اپنی اکھ ول ویندا نئیں
گٹے گوڈے دھونا ایں بندیا، دِل اپنے نوں دھوندا نئیں
آپ نہ اینے جوگے ہوئیے، دوجے نوں گلاں کرئیے نہ
۳
نازؔ کہانی سُن لے بندیا، تینوں مَیں سمجھانا واں
اپنے گھر دی راکھی کر لے، چور وانگوں میں آؤنا واں
اپنے گھر دی راکھی کرئیے، دوجے نال ایویں لڑئیے ناں
۴
بھائی انورؔ تُوں جس پیمانے نال کسے نوں مننا ایں
تینوں وی تے بندیا ربّ نے اوہدے نال ہی مننا ایں
آپ جے انھے ہوئیے تے فیر دوجے نوں بانہوں پھڑئیے نہ