ابنِ خدا کی آج ولادت کی عید ہے

ابنِ خدا کی آج ولادت کی عید ہے
شاہ و گدا کے واسطے روزِ سعید ہے
۱
وہ ہے عجیب اور مشیر و قدیر یاہ
بے مثل بے نظیر ہے ابنِ وحید ہے
۲
آئے گا وہ جہان میں کہتے تھے سب نبی
جس کی کبھی شنید تھی آج اس کی دید ہے
۳
حاصل کرے گا آج ہی جنت کو بے گماں
ہر اک گنہگار جو اس کا مرید ہے
۴
ضامن ہے عاصیوں کا خدا کے حضور میں
ارض و سما کا ایک وہ منجی فرید ہے
۵
کس پیار سے بلاتا ہے وہ عاصیوں کو آج
پڑھ کر ذرا تُو دیکھ جو عہدِ جدید ہے
۶
جو آئے گنہگار اُسے وہ نکال دے
یہ اُس کی ذات پاک سے بالکل بعید ہے