دار پہ قرباں کون ہُوا ہے

دار پہ قرباں کون ہُوا ہے
درد میں ڈوبی شام بتا
جس نے جان فدا کی ہم پہ
اُس محسن کا نام بتا
۱
کس کے ظلم کی آگ ہوئی ہے
سرد کہ سینہ جلتا ہے
کیا اِس دنیا میں یوں ہر سو
حکم جفا کا چلتا ہے
یہی صلہ ہے کیا نیکی کا
اور یہی انعام بتا
۲
کون سی غم کی ماری ماں کی
آنکھ کا تارا ٹوٹ گیا
اس کے دل کا چین لٹا ہے
اور مقدر پھوٹ گیا
کس نے سُکھ کی آس میں پائے
انجانے آلام بتا
۳
کیا دیکھا ہے تُو نے اُس
بے عیب کا یہ غم ناک سفر
سولی ، کانٹے ، کوڑے ، پتھر
اور کٹھن یہ راہ گزر
تو مغموم اُداس ہے کیونکر
شامِ اَلم آ شام بتا
۴
کس معصوم کے خون کا دھارا
تیری شفق میں پھیلا ہے
کچھ تو خبر دے شامِ غریباں
تیرا دل کیوں میلا ہے
کون سی شب ہے صبحِ درخشاں
جس کا ہے انجام بتا