ٹُٹے شیشے دِلاں دے بنا دے

ٹُٹے شیشے دِلاں دے بنا دے
مسیحا سرجن ہاریا
ساڈا مُردا ایمان جوا دے
او زندگی دیا مالکا
۱
تینوں ہین توفیقاں ساریاں
ساڈی کر بے ایمانی دیاں کاریاں
ڈیرا ساڈے دِلاں وچ لا لے
او صبح دیا تاریا
۲
اُتوں آ گیا وقت اخیرا دا
لوکی کردے نے فکر شریر دا
اَنھی دُنیا نُوں لو تُوں لگا دے
چمکا دے نُور پیاریا
۳
کرو ہوش تے چھڈو ایس خیال نُوں
کوڑا سمجھو جہان دے مال نُوں
لگن اپنی تُوں سب نُوں لگا دے
بچاون ہاریا
۴
تیرے آؤن دا وقت ہے آ گیا
جو سی جاگدا اوہ وی اونگھلا گیا
تیری رُوح دی پھُوک جگا دے
اُٹھا دے سب نُوں پیاریا
۵
دُنیا کیتی اے اَنھی شیطان نیں
کیتی مست ہے پہنن کھان نیں
نشہ روح دا سب نُوں پلا دے
اور زندگی دیا مالکا
۶
ایتھوں کجھ نئیں لے جانا اپنے نال ہے
ساڈا نئیں بیگانہ ایہہ تے مال ہے
نافرمان کیوں بن گئے خُدا دے
تے اوہنوں کیوں وساریا
۷
لاہ دے دُنیا دا ساڈے اُتوں جال تُوں
یسوع ساہنوں رلا لے اپنے نال تُوں
ساہنوں دشمن دے ہتھوں چھڈا کے
پہنچا دے سورگیں پیاریا