محبت کے جرائم کی سزائیں اور ہوتی ہیں

محبت کے جرائم کی سزائیں اَور ہوتی ہیں
حیاتِ جاودانی کی بلائیں اَور ہوتی ہیں
1
نیا نسخہ بناؤ چارہ سازو چارہ سازی کا
قدیم المرض قوموں کی دوائیں اَور ہوتی ہیں
2
نجانے دار پر ڈاکو کے منہ سے کیا صدا نکلی
ملے فردوس جن سے وہ دعائیں اَور ہوتی ہیں
3
اگر دیکھیں اُسے تو مگدلینی کی طرح دیکھیں
مسیح کو دیکھنے والی نگاہیں اَور ہوتی ہیں
4
یونہی باتیں بنانے سے یہ منزل طے نہیں ہوگی
مسیح کے پاس آنے کی وہ راہیں اَور ہوتی ہیں