جگ وچ آیا آپ غفار

جگ وچ آیا آپ غفار
کیتا جس نے بیڑا پار
مریم دے گھر آپ اوہ جایا
رب دا بیٹا بخشن ہار
۱
گھر گھر سّیاں دین ودھائی
اوہدے جنم دی کرن پُکار
تارن خاطر جگ وچ آیا
بیت لحم وچ لیا اوتار
۲
دھیان کرو اسماناں اُتے
آئے دُوت ہزار ہزار
کہندے ہو تعریف خُدا دی
میل صُلح ہو وچ سنسار
۳
مُکتی دا راہ اوہنے دسیا
نبیاں دا ہے اوہ سردار
چلو اوہنوں پُوجن چلئے
ویکھو اوہدا چل دربار
۴
ویکھو جاندے ہین ایالی
اوتھے عرضاں دین گزار
جانا اوتھے ساہنوں ہیگا
ہوؤ چھیتی نال تیار
۵
اُٹھو اُٹھو نیندوں جاگو
غفلت چھڈو ہو بیدار
آیا پیارا ساڈا ویکھو
جس دی نویوں نویں بہار
۶
جندڑی ہے ایہہ چار دیہاڑے
ایہدا نہ کر کُجھ اعتبار
تُوں جو مُردہ وچ گناہ دے
تیری لیندا ہے اوہ سار
۷
تینوں اپنے کول بُلاوے
اوس تھوں نہ کر تُو انکار
پاپ دا چَسکا لگیا تینوں
تینوں حِرص نے کیتا خوار
۸
یسوع آیا ویکھ اوئے پیارے
دیندا تیرا بھار اُتار
تیرا کوئی نہ بیلی ہووے
تیرے سارے کھوٹے کار
۹
ڈاہڈا گُھمن گھیرا گُںاہ دا
ہوویں گا تُوں کِیکر پار
ڈاہڈے نال ہے بازی لگی
اوڑک دیویں گا تُوں ہار
۱۰
رکھ ایمان مسیح دے اُتے
کر لے ہُن تُوں استغفار
سبھناں بدلے جان اوہ دیندا
اوس تھوں جان کرو بِلہار