حنہ دلگیر نے دعاواں منگیاں

حنہ دلگیر نے دعاواں منگیاں
نہ اکھاں سنگیاں نہ بانہواں تھکیاں
۱
دل دل وچ کہندی حنہ رب نُوں
جہیڑا تیتھوں منگے ربا دیناایں سب نوں
کہیڑیاں نے میرے نالوں ہور چنگیاں
۲
ربا پت دے دے میرا رونا سن کے
چاڑھان دوارے تیرے ہتھ بنھ کے
کٹ دے نمانی دیاں سب تنگیاں
۳
عیلی کہندا حنہ نوں نہ کر قصور نی
ہر ویلے نشے وچ رہنی چُور نی
کرنی ایں نشے وچ گلاں مندیاں
۴
حنہ کہیندی مالکا میں دساں بول کے
میں ہاں دکھیاری روواں دکھ پھول کے
نشہ میں نہ کیتا نشے وچ رنگی آں
۵
عیلی کہندا حنہ نوں سلامت چلی جا
تیری وی مراد پوری کرے گا خدا
خوشیاں وی حنہ کول آن لنگھیاں
۶
رب نے حنہ دا ایمان ویکھیا
پت دتا نام سموئیل رکھیا
ہو گئیاں مراداں دلاں دیاں پوریاں