غضب ہے اب تک گناہ کا کانٹا جگر میں میرے کھٹک رہا ہے

غضب ہے اب تک گناہ کا کانٹا جگر میں میرے کھٹک رہا ہے
جو چھوڑ رستہ نجات کا دل کہاں کہاں وہ بھٹک رہا ہے
۱
ہمارے طالع ہوئے ہیں یاور فلک سے آیا زمیں پہ داور
ہوا ہے مریم کے گھر میں ظاہر غریب خانہ چمک رہا ہے
۲
خدا کے بندوں میں جان آئی جو آج جانِ جہان آئی
نجات آئی زمیں پہ بھائی فلک بھی حسرت سے تک رہا ہے
۳
فلک پہ خوشیاں منا رہے ہیں فرشتگاں غُل مچا رہے ہیں
خدا کی تعریف گا رہے ہیں خوشی سے بادل کڑک رہا ہے
۴
سنو تو بیت لحم میں آیا خدا کا بیٹا نجات لایا
یہ مژدہ ہم نے تممہیں سنایا کہ سر کو شیطاں پٹک رہا ہے
۵
یہ کیسا چہچہا ہے آج ہر سو صدائے قمری ہے کیسی کُو کُو
یہ برگ و گل میں ہے کیسی خوشبو کہ باغِ عالم مہک رہا ہے
۶
وہ آج عالم میں گُل ہے آیا کہ جس پہ بلبل کا دِل ہے آیا
خزاں کا جس پہ نہیں ہے سایہ اُسی کا تارا دمک رہا ہے