عرشاں دے راج دُلارے نیں ، چرنی وچ رات گزاری

اِک درشن چرنی والے دا ، اکھیاں وچ چانن کر گیا اے
بیت لحم ساری دُنیا دے ، شہراں وچ چانن کر گیا اے
چرنی تھوں سجرا دِن چڑھیا، ہر قوم قبیلہ جاگ پیا
شاہ نور حق سچ دا، قوماں وچ چانن کر گیا اے
...
عرشاں دے راج دُلارے نیں ، چرنی وچ رات گزاری اے
اوہدی رنگت نُوری نُوری اے ، اوہدی صورت پیاری پیاری اے
۱
چرنی وچ عجب نظارا، فردوس دا راج دُلارا اے
چرنی تھوں فضل شفاواں دا، ہر فیض وی جاری ساری اے
۲
ہر شہر دا رستہ بیت لحم، ہر دِل وچ وسدا بیت لحم
شہراں دا شہر ہے بیت لحم، ایس شہر دی شان نیاری اے
۳
چرنی تھوں فرشتے ہٹدے نئیں، شافی دی دید تھوں رجدے نئیں
چرنی اے دید صلیبی دی، انساناں دی ہُن واری اے