دھن دھن آکھو ابنِ داؤد یسوع بادشاہ آیا ہے

دھن دھن آکھو ابنِ داؤد یسوع بادشاہ آیا ہے
اوہدا راج ہے جُگاں تیکر جس دا اَنت نہ پایا ہے
۱
رب خداوند نے ہے میرے آپ خداوند نوں ایہہ کیہا
میرے سجے پاسے بیٹھ کوئی ہور نہ تیرے جیہا
سارے ویری چوکی پیراں دی ہوون فرمایا ہے
۲
میتھوں منگ کراں میں قوماں سبھے قبضے دے وچ تیرے
حداں تیکر ہووے راج ساری دھرتی چار چوفیرے
سوٹا لوہے گا پھڑ قوموں اُتے راج پھیلایا ہے
۳
نبی یسعیاہ صدیاں پہلاں دِتا دُنیا تے آوازہ
اوہدا نام عجیب مشیر ہووے صلح دا شہزادہ
ساری بادشاہی دا بھار جس نے موہڈے چایا ہے
۴
جبرائیل فرشتے مریم نوں جد دتا ایہہ پیغام
بیٹا تیتھوں ہووے جہیڑا اوہدا یسوع رکھیں نام
اوہنوں تخت داؤد والے اُتے رب بٹھایا ہے
۵
یسوع بادشاہ دی جے دے سارے اُچے مارو نعرے
حداں دُنیا دیاں تیکر اوہدا راج پھیلاؤ سارے
یسوع بادشاہ نے سنبھناں نوں حکم سنایا ہے