کرسمس بولیاں

۱
اک وکھرا ای تارا سی
پوربی مجوسیاں دا ، جہیڑا بنیا سہارا سی
۲
پرفضل پیاری دا
بیٹا رب دا جے ، اج بنیا کنواری دا
۳
پئے دوت سی گاؤندے رہئے
بن کے ٹولیاں وچ ، سارے جنگ نوں سناندے رہئے
۴
تارا اگے اگے جاندا سی
پوربی مجوسیاں نوں پیا راہ او وکھاندا سی
۵
رب روپ وٹایا اے
عرش نوں چھڈ کے تے ، ڈیرا چرنی چ لایا اے
۶
چرنی وچ نور آیا
جگ دے ہنیریاں نوں ، اج کرن او دوُر آیا
۷
سب راہواں سجیاں نیں
چرنی دے ول چلئے ، اوتھے رونقاں لگیاں نیں
۸
خوش رنگ نظارے نیں
دنیا چ یسوع آیا ، ویکھو خوش اج سارے نیں
۹
پورا ہویا اج وعدہ
جگ اتے آیا اے ، صلح امن دا شہزادہ
۱۰
اے دہائی مچ گئی اے
جدے وچ یسوع آیا ، او چرنی سج گئی اے
۱۱
خوشخبری سناؤندے نیں
گیت فرشتے وی ، پئے عرشاں تے گاؤندے نیں
۱۲
چن بدلاں تے ہسدا اے
ٹم ٹم تارے نچدے ، مینہ رحم دا وسدا اے