یہ رَنج پُوچھ تُو جاں سے گُزرنے والے سے

عمانوئیل نذیر مانی غزلیات مشاہدات: 73 پسند: 0

خُوشی بھی رُوٹھ گئی ہے سنورنے والے سے

ہمارا رِزق اُسی کے ہے ہاتھ میں لِکھّا

اُمیدیں سَب کی ہیں گھر سے نِکلنے والے سے

کِسی نے جانا نہیں خاک کی حقیقت کو

کِسی نے پُوچھا نہیں کُچھ بِکھرنے والے سے

عجیب طرح کا عَالم ہے اِن فَضاؤں میں

ہیں رُوٹھے سارے ہی مَنظر اُجڑنے والے سے

ہَوا بھی ریت پہ لِکھ کے گئی ہے یہ نوحہ

بَڑا قریب تھا دَریا تڑپنے والے سے

مَیں کیسے اَشک چھُپاؤں بتاؤ آنکھوں میں

مَیں کیسے ہاتھ مِلاؤں بِچھڑنے والے سے

وہ ایک شخص ہی تَنہا نہیں زمانے میں

گُریزاں سَب ہی ہیں مانیؔ جھگڑنے والے سے

واپس جائیں