مِرا پیچھا جو کرتی تھیں دُعائیں یاد آتی ہیں

عمانوئیل نذیر مانی غزلیات مشاہدات: 82 پسند: 0

مَحبّت کی سبھی شیریں صدائیں یاد آتی ہیں

گلی میں کھیلتے بچّوں کو اِک ٹُک دیکھے جاتا ہُوں

وہ بچپن کی مُجھے ساری اَدائیں یاد آتی ہیں

خُدارا بس کرو لڑنا نہ کھیلو خُون کی ہولی

وہ جِن کے چھِن گئے بچّے وہ مائیں یاد آتی ہیں

شجر سے ٹُوٹ کر پتّے نہیں جُڑتے کبھی لیکن

پرندوں کی درختوں سے وفائیں یاد آتی ہیں

پُرانی ڈائری کھولیں تو پلکیں بھِیگ جاتی ہیں

جو ہم ناراض رہتے تھے اَنائیں یاد آتی ہیں

مُجھے حالات کے سانپوں نے اب جب گھیر رکھّا ہے

کہانی میں جو سُنتے تھے بلائیں یاد آتی ہیں

مُعافی کی دُعائیں روز کرتا ہُوں مَیں خالِق سے

جو ماضی میں ہوئیں وہ سب خطائیں یاد آتی ہیں

دِلِ بیمار تیرا کوئی بھی اِحساں نہیں بھُولا

تِرے دِیدار سے پائی شِفائیں یاد آتی ہیں

دیارِ غیر میں مانیؔ میسّر ہے سبھی کُچھ پر

وہ ماں کے ہاتھ کی دیسی غذائیں یاد آتی ہیں

واپس جائیں