اُٹھو غمناک خانوں میں سجا کر سولیاں رکھ دو

گریفن جونز شرر غزلیات مشاہدات: 71 پسند: 0

ہر اک گم گشتۂ منزل کی راہ میں سیڑھیاں رکھ دو

۔۔۔

عشا کا خون پی پی کر زباں میری کسیلی ہے

میرے منہ میں نئی انجیل کی شیرینیاں رکھ دو

۔۔۔

میں گر گر کر اُٹھا ہوں، سر بکف کنعاں میں پہنچوں گا

سرِ منزل تلک لاکھوں تڑپتی بجلیاں رکھ دو

۔۔۔

پلے ہیں دم بدم ہم ظلم کے گہرے نشیبوں میں

سروں پہ لا کے کانٹوں کی ہمارے ٹوپیاں رکھ دو

۔۔۔

بہ ہر حالت صدائے حق دہن سے میرے نکلے گی

حوادث کی میرے کندھوں پہ بھاری سولیاں رکھ دو

۔۔۔

تہِ دیوارِ زنداں میری بدحالی پہ مت روؤ

دریچوں میں مرے سر و سمن کی ٹہنیاں رکھ دو

۔۔۔

نکل جاؤں گا بچ کر وقت کے ایماں فروشوں سے

جبیں پہ میرے خونِ کلوری کی سُرخیاں رکھ دو

۔۔۔

بہت سی مشکلیں آسان ہو جائیں گی ملت کی

صبا کے دوش پر شعرِ شررؔ کی شوخیاں رکھ دو

واپس جائیں