ذرا ٹھہرو خموشی میں طوالت ہونے والی ہے

ونسینٹ پیس عصیم غزلیات مشاہدات: 59 پسند: 0

کھلی آنکھوں میں جیسے اب اقامت ہونے والی ہے

۔۔۔

فضاؤں میں ہواؤں کا چلن کچھ مضطرب سا ہے

بظاہر اب کوئی اچھی علامت ہونے والی ہے

۔۔۔

ہنسی کے نشتروں میں ماتمی نوحہ اُبھرتا ہے

کہ ایوانِ قلم داں میں قیامت ہونے والی ہے

۔۔۔

سخن دانو! سخن سازو! یہ ساعت ٹھہری ٹھہری ہے

کہ فنِ شوخ میں اب تو متانت ہونے والی ہے

۔۔۔

گریزاں ہاتھ اک دوجے سے چہروں پر نقاب آیا

کہ اب آنکھوں ہی آنکھوں میں شرارت ہونے والی ہے

۔۔۔

سرِ رہ عشق میں ٹھوکر لگے جو بے نیازی کی

تو سمجھو اب مروت میں کفایت ہونے والی ہے

۔۔۔

ہر اک راہ پر ہیں دیوانے ہر اک شہ راہ پر رہزن

کہ اب گلشن پہ صحرا کی امامت ہونے والی ہے

۔۔۔

بس اک تصویر خانہ زادِ بومِ ناز اب دیکھو

یا پھر آواز میں ہی بس رفاقت ہونے والی ہے

واپس جائیں